مش قادرة انساك :(

مش قادرة انساك مهما حاولت .. كل يوم بحلم بيك حتى لو ما كنتش بفكر فيك قبل ما انام

وكل يوم بحلم انك رجعت لي تاني :(

بس مافيش فايدة ولا أمل 

خلاص ضعت وربنا يعوض عليا

ماكنتش عارفة اني بحبك للدرجة دي واستغربت انا ازاي ما كنتش مسمياك ؟

وحشتني .. ربنا ينتقم من اللي سرقك مني يارب

ياااااااااااااااااااااااارب والله تعبت اوي

مش قادرة استحمل تاني يارب هونها يارب

يارب صبرني والنبي يارب يارب صبرني على قد الابتلاء يارب

يارب قاوحت كتير بس مش قادرة انا بجد بنهار

نشوة

اكتشفت اني بضحك في الميكروباص من غير سبب - من وجهة نظر الناس - تفتكر قالوا عليا مجنونة ؟؟

مش مهم بس المهم اني بجد بعشق جنوننا

♫ أهي قلبت بجد شكلنا كده هنحب بعض .. اوعى تقول لي لأ حلفتك تتكلم بحق .. دا انا قلبي ما بيبطلش دق اول ما عيني تيجي في عنيك ♫

على فكرة انت شرحتلي الــ " يميني " وما شرحتليش الــ " يساري " اللي أصلاً انت شرحت اليميني علشان تشرحه

... تعرف انا بحب اوي احس انك استاذي وبتعلمني

♫ صدقني خلااااااااااااص من بين الناس حبيتك واخترتك ليا .. طول ما انا ويااااااااك قدامي ملاك خلتني ما اغمضش عنيا

الله .. يا سلام دا هواااااك احلى كلام ♫

كان نفسي اطبطب عليك أوي وانا حساك مخنوق .. متضايق .. و انت بتشتكي لي واتخنقت بالدموع

   بس أعمل ايه .. طبطبت عليك بعيوني .. وقولتلك ألف مليون معلش ما طلعتش من شفايفي 

♫ إحلم معاااااااايا   ببكرة جاااااااااي ولو ما جااش احنا نجيبه بنفسنا ♫

هي ليه الدنيا مش سهلة ؟؟

سؤال بسأله لنفسي مليوووووون مرة كل ما اقعد افكر في المشاكل اللي واقفة في طريقنا

بس برجع اقول .. لولا المشاكل فرحتنا ببعض مش هتبقى بالروعة اللي في خيالي

♫ استنيت سنييييييين كتير يوم اللقا .. واتمنيت اعيش معاك وافرح بقى .. ♫

ماعرفش ليه كنت حاسة اني عايزة اغمض عيني وبعدك ما اشوفش حاجة ولا حد

احساس غريب بالرضا واني مستعدة اموت حالاً قبل ما تحصل حاجة تنسيني فرحتي بيك

فرحتي بنظرتك اللي بجد بتطمنني

♫ انا عمري ما قولت ان انا خايف غير بعد ما قلبي اتمناكي .. محتاج اتطمن مش عارف

الخوف جوايا وجواكي .. قويني قولي لي انك ليا .. علشان اتحمل لياليا .. وتعيييشي واعيييييش ♫

ما قولتش أي حاجة من اللي عايزة اقولها

ولا حسمت أي حاجة من اللي محيراني

بس بجد .. ردت فيا الروح

♫  من غييير كسووووف قولتي لي انا عشقالك .. انا بعترف بهواك انا من زمان عايزاك تبقى حبيب قلبي ♫

يوم ولادة نسمة

كنت في رابعة ابتدائي وكانت أول مرة في حياتي قطتي تولد .. كنت بحب نسمة أووووووي واترعبت عليها لما سمعتها بتتوجع .. وهي يا عيني تبص لي كأنها بتستنجد بيا

كانت متدلعة اوي ، أول قطة تقعد تولد في 3 قطط من الساعة 11 الصبح لحد 8 بالليل .. القطط التانية بتنجز في الوينجز وتولد في نص ساعة

المهم بقى قعدت اعييييييييط وادعي لها وهتجنن عليها ووقتها ما كنتش منتظمة أوي في الصلاة لكن يوميها صليت كل الصلوات علشان ربنا يسمع مني وكل شوية اصلي ركعتين لله علشان يساعدها

وكنت انا اخلص صلاة وماما او اختي يدخلوا يصلوا لها ونعييييييييييط كلنا

وبعدين ربنا كرمها بقى وجابت اول قطقوطة .. كانت قمرررررررررر كان لونها أبيض وفيها اسود على خفيف كده

حطيت لها - لنسمة يعني - لبن كتييييييييير .. كل البيت اتبرع لها بنصيبه في اللبن

واتبرعت لها بنصيبي في اللحمة وحطيت لها شوربة .. كان فرررررررررررح

انا لو منها اولد كل يوم هههههههههههههه

المهم الموضوع دا جه في مصلحتي لأني ماكنتش بحب اللبن وكنت بديه للقطط من ورا ماما

لكن لما ولدت بقيت اديها نصيبي قدام ماما وبرضاها :D

بعدين بقى على العصر كده جابت تاني ابن .. كان نصه ا سود ونصه ابيض وقمررررررررررر ولما كبر كان شقي اووووووي

تالت ابن جابته على الساعة 8 بالليل ... كان كله اسوووود << واضح ان الانتاج بيتدهور ههههههههه الحمد لله انها ماجابتش رابع

بس دا ياعيني مات بعدها بكام يوم وهي كانت زعلانة اوي وجابته قدامي وقعدت تبص لي وتبص له وتنونو كانها بتعيط

وتهزه بايديها وتزعق له كأنها عايزاه يقوم

اخدته منها بقى ودفنته ف الجنينة

لما ولادها بقى كبروا وفتحوا عينهم عملت لهم سبوع

اه والله جبت ريحان وزوقت لهم الصندوق اللي قاعدين فيه وقعدت اغني لهم والاعبهم

- اكيد كانوا بيقولوا ايه العبيطة دي ؟؟ -

مش عارفة ليه بكتب الكلام دا دلوقتي  بس لما سمعت نونوة قطة في الشارع حسيت ان نسمة وحشتني اوووووووووووووووي

هو ممكن ؟

هو ممكن فعلاً اعيش الحاجات اللي بكتبها دي ؟؟
بحلوها ومرها ؟
ممكن اعيش العيشة اللي بتمناها واللي بخاف منها ؟
ممكن اوصل في شغلي للي بحلم بيه
واتجوز الانسان اللي بتمناه واعيش حياة بحلم بيها ؟؟
مش عارفة !! بس يارب
يارب اعيش اللي بتمناه مش اللي بخاف منه
ويارب احس بأمان

3 مايو 2009

تاج لااااااااااااااسع ملسوع

التاج دا جالي من ( واحد مخه لاسع )


1- لو كان ينفع تختار عصر تعيش فيه هيبقي انهي؟ ومين الحاكم؟

- اممممممممممم أعيش في أيام السادات .. ياسلااااااااااام عليها أيام ، ريحة النصر لسة طازة لسة الناس عندها امل
السادات عايش موسى صبري عايش أمل دنقل عايش .. في بعد كده ؟؟


2- أول أولويه في حياتك؟

- اني انجح ع كل المستويات بقى شغلي حياتي .. كله كله

3- أكتر حاجه بتحبها في رمضان؟

- الشارع وقت المغربية .. بقف ف البلكونة اتفرج عليه بجد بيبقى خرااااااااااااافة .. بحس ان الطيبة عاملة غلاف جوي حوالين كل البلد ف الوقت دا

4- أوصف أجمل فطار ممكن تفطره؟

-فطار مع كل بنانيتي .. أميرتي والاء ويويو ودودو ودودو والفور كاتس وهبة ورؤى والبنانيت اللي بحبهم من المدونات

5- لو انت حاكم هتكون عادل؟ وهتعرف ازاي؟

ما اظنش هقدر احقق العدل المطلق لكن هحاول اكون عادلة بأكبر قدر ممكن
هعرف من اني هلاقي نفسي قادرة امشي وسط الناس من غير حرس !!


6- مين أكتر اعلامي بتحبه؟

- المسلماني بيعجبني أوي


7- لو ممكن شغلانه تانيه تختار ايه؟

- مهندسة كمبيوتر

8- تاني بلد تحب تعيش فيه بعد مصر؟

- العراق


9- اوصف ترتيبات أجمل فرح ممكن تحضره؟


فرحي ههههههههههههه اجمل فرح بالنسبة لي هيبقى فرحي

الترتيبات : عروسة << اللي هي أنا
عريس << الانسان اللي أتمنى اكمل عمري معاه

ومأذون بقى وكده وبعدين نروح ع بيتنا .. يعني بيتي .. اللي هو بيته ... مش مهم ايه هيحصل ف الفرح لأني كفاية عليا اني معايا الإنسان اللي بتمناه وبس

بس في ترتيبات اكييييييد لفرحي في دماغي .. منها حاجات ممكنة وحاجات مستحيلة بس لو بطلنا نحلم نموت هههههههههه


10- بتراعي كلام الناس والقيل والقال؟ وليه؟

-آه .. أووووووووووووووي

لأني اتعودت على كده كمان سيدنا محمد - صلى الله عليه وسلم - أمرنا نتجنب الشبهات ومش حلو ان البني آدم سيرته تبقى وحشة يعني وهو مابيعملش أصلاً حاجة وحشة .. مالهاش لازمة


11- صحيت من النوم لا موبايل ولا كمبيوتر ولا كاميرا ديجيتال ورجعنا لعصر الاحصنه والحمام الزاجل؟

- هنام تاني لحد ما يرجعوا ههههههههههههههههه

12- السعاده هي ... ؟

راحة البال ودي بتحصل لما ربنا يكون راضي عنك ولما تكون انت راضي عن نفسك وعن احوالك

13- عندك أمل؟ وأسبابك؟
- أكيد عندي أمل والسبب ثقتي بربنا

14- لما تحب تهرب من كل حاجه بتروح فين؟
- للأسف مافيش عندي مكان اهرب ليه

15- امتي أخر مره أخدت فيها نفس وقلت ياااااه أنا كبرت؟

يوم عيد ميلادي :( ماتفكرنيش بقى

16- بتشرب سجاير ولا لا؟ وايه رأيك في الستات والرجاله اللي بيشربوا؟

لأ مش بشرب ، رأيي فيهم انهم ناس ضعيفة جداً لأنهم بيهربوا من ضغوطهم للسجاير

17- بتعرف ايدك الشمال ازاي؟

ههههههههههههههه السؤال دا خبيييييييييييييييييييث

احم بصراحة لما اكون فايقة شوية بعمل نفسي هكتب فالأيد اللي الاقيها اخدت وضع الكتابة تبقى اليمين

لما اكون فاصلة بمد ايدي ع كتفي ادور ع الحقنة بتاعة الابتدائي :D


18- أكتر آله موسيقيه بتحبها؟

الاكسليفون .. رقيق أوي صوته

19- ليه الزوق والنخوه اتعدموا؟

- علشان الناس شايفة ان اللي اختشوا ماتوا واللي نهبوا وسرقوا وماعندهمش قيم ولا مبادئ عايشين أحلى عيشة

20- ايه الحاجات اللي لو حصلت هتبقي سعيد؟
- امممممممممممممممم رقم واحد : .......................

اتنين : ................................

تلاتة بقى : .......................................


21- تحب أرض زراعيه ولا اجمد عربيات ولا كام عماره ولا فلوس في البنك؟

امممممممممممممم بيت صغنن في أرض زراعية وعربية محندقة وشيك إذن اختار الفلوس علشان اشتري بيهم دول هههههههههههه


22- تحب البحر ولا النيل؟

البحر

23- مركب ولا طياره؟

مركب

24- شخص مجنون ولا عاقل؟

شخص مجنون بعقل :)

25- تقرا كتاب ولا تتفرج علي فيلم؟

- حسب المود والتعب بس لو ف حالتي الطبيعية كتاب


اهداء التاج

للي عايز يلا اوكااااااااااااااااااااازيون

أنا بالونة !!

آدي اللي بناخده م المذاكرة وسنينها

امبارح طول الليل لحد الفجر سهرانة بعمل بحث الصحافة وطلعت عيني وايدي بقت شبه ايد عامل المطبعة

المهم بقى لما جيت انام النهاردة ماعرفتش انام على طول هيست ع روحي شوية كده في حالة شبه الغيبوبة

انا لا نايمة ولا صاحية

وفجأة حسيت اني بالونة


وحسيت اني بطير بجد وكنت مستمتعة أوي .. كنت بالونة زرقا كمان

والله بجد حسيت احساس الطيران بالظبط زي البالونة

طايرة فوق الناس وكنت طايرة في مكان شبه مدرسة الابتدائي بتاعتي

وطايرة فوق السلالم وكنت خايفة اوي اخبط في السقف افرقع ههههههههه

وبعدين كنت طايرة وانا بالونة البالونة اللي هي انا كانت عارفة رايحة فين

بس انا اللي مش بالونة ماكنتش عارفة انا رايجة فين

بس لما وصلت عرفت

طلعت كنت بدور ع الشمس والهوا

طلعت في الطرقة اللي قدام الفصل دي وعايزة اطير ع حوش المدرسة

اللي قلب بقى حوش مدرسة الثانوي مش مدرسة الابتدائي

بس كان في ناس كتير في الطرقة دي وبيتخانقوا عليا

( ع البالونة يعني ) وقعدوا يتخانقوا وكل حد فيهم يحاول يمسكني

وكانوا لابسين كحلي زي الاعدادي

المهم فرقعت بقى في ايديهم منهم لله

وصحيت بقى م الحالة دي ونمت

وصباح الخير

:)