هؤلاء يسكنون كوكبى ..

اوضتى هى كوكبى الخاص ، اكتر مكان برتاح فيه فى الدنيا (( برغم
ان مافيهاش الكمبيوتر ): هو اللى فاضل وتبقى جنة الله فى الارض ههههههههه )) ،
ومهما كنت بعيدة فى سفر ومرتاحة ومستمتعة بتوحشنى اوضتى جدا لدرجة انى بنام احلم
بيها ..

اجمل حاجة فيها ان كل مافيها فيه لمستى الخاصة ، هى الحاجة
الوحيدة فى البيت اللى بقدر اغير فى ترتيبها ونظامها ..

وبمجرد ما باباها يتقفل عليا بحس انى فى امان وبحس انى فيها اقدر
اخرج كل حاجة جوايا ..

واللى ساكنين كوكبى اجمل مافيهم انهم من اختيارى ، وانهم مش
مفروضين عليا زى ما حاجات كتير فى الدنيا بتتفرض عليا ، وزى ما ناس كتير بيدخلوا فى
حياتى غصب عنى ..

كتير اوى كنت بعتبرها مركبة فضاء بتتقفل عليا وبروح لعالم تانى

واللى هحكيلكم عليهم دول بعتبرهم كائنات حية فى كوكبى ، كتير اوى
بقعد ارغى معاهم وكتير اوى بيكونوا السبب فى تغيير مودى ..

كفاية اوى انى اغير من اماكنهم واوضاعهم علشان احس بتغيير كمان
بحب اوى الحاجات اللى علقتها على الجدران .. علشان كسرت بيها قانون رسمى فى البيت
بانه ممنوع منعاً باتاً تعليق اى حاجة على الحيطان ..

اول سكان كوكبى هو سيمبا .. سيمبا ساكن فى الجدار اللى قصاد
سريرى ومكتبى .. كل ما احب استمد الشقاوة والعفرتة ببص على صورته وهو بيلعب بديله
ومتأهب للعب ..

وفى نفس الوقت كل ما احس انى مخنوقة بالعياط ببص لصورته وافتكر
احب قططى ليا اللى كنت معتبراه ابنى ، وفى البيت ما يقولوش عنه غير ابن سارة .. كان
اسمه سيمبا ،فكل ما اشوف صورته افتكر ابنى وافتكر المشهد اللى باباه بيموت ويتشرد
هو وهو فاكر انه السبب فى موت باباه وافتح فى العياااااااااااااط ..

وبعدين بطوط .. بطوط ساكن فوق سيمبا على اليمين ، كل ما احب اعيش دور
الاعلامية ، واتحمس للمذاكرة علشان اتفرغ للشغل ، ببص على صورته وهو بيقول خطبة
عصماء وقدامه ميكروفونات واخر انتكة .. دا غير انه شخصية الكرتون اللى قريبة بجد
منى ، وشخصيته زى شخصيتى ..

ميكى بقى ساكن فوق سريرى بالظبط ، مجسم ليه وهو مسخسخ وماسك بطنه
من كتر الضحك ، الصورة دى حطيتها فى المكان دا علشان الصبح وانا بحضر حجاتى وماشية
ابص عليها فاتفائل .. بس عايزة اقولكم انى عمرى ما بفتكر ابص عليها غير بالليل
هههههههههههه

(( دى الصورة بالظبط .. طلعت عينى عقبال ما صورتها بس فداكم ))

ثم ارنوبى المشنوق .. دا متعلق من ودانه فى السقف من ايام
الامتحانات والسبب انى كنت زهقانة وانا لوحدى بالليل بذاكر .. وحسيت انى محتاجة حد
يقعد معايا فمالقيتش قدامى غيره قررت اعلقه فى السقف بحيث يبقى نازل كده وقاعد
قصادى وانا بذاكر (( ايوة اشمعنى انا اتعذب لوحدى )) .. ماما حاولت تدافع عنه الف
مرة وتقنعنى وتقولي (( يابنتى حرام عليكى البتاع دا مش هترحميه بقى وتنزليه
))

بعد كده القطة ام عيون زرق : غالية عليا اووووووى علشان هدية من
اعز صديقة ليا ،وعلشان طول عمرى بحب القطط ام عيون زرق وكل ما قطة عندى تكون
حامل بقعد ادعى ربنا تجبلى قطة عيونا زرقاء لكن للسف لحد دلوقتى ما حصلش ...

_________________

تحديث مهم أوووووووووووى

الكمبيوتر دخل اوضتى يا ناااااااااااااااااااااااس

بقت جنة بالنسبة لى

ما قبل الكابتشينو

مرحلة ماقبل الكابتيشنو دى عندى بيحصل فيها بلااااااااااااااااااااوى

بفضل فى شبه غيبوبة لحد ما اشربه كده ابدأ اركز ..

من امثال البلاوى اللى بتحصل قبل الكبتشينو

مثلا اروح ال WC وطبعا بابه بيبقى مقفول

فاولع النور واقف اخبط على الباب واستنىىىىىىىى

ماهو نوره والع والباب مقفول يعنى فى حد جوا

ربع ساعة بقى على ما استوعب انى انا اللى مولعة النور

بلوة تانية مرة كنت هغسل سنانى بمعجون الحلاقة ، واقول ياربى المعجون ماله بقى كبير كده ليييييييييييييه

(( بس الحمد لله لحقت نفسى ))

وكتيييييييييييير بقى اقلع النظارة فى اى حتة واقلب عليها الدنيا

وكتيييييييييييير اقلعها واجى اتوضى امد ايدى اقلعها تانى واتضايق اوى لو مش لقيتنى لابساها

بجد بجد ربنا يديم الكابتشينو عليا نعمة

بث مباشر لمراسم الاحتفال بعيد ميلادى

بصراحة انا ما اتعمليش عيد ميلاد واحد .. انا اتعملى 3 عيد ميلاد

اتنين امبارح وواحد النهاردة

(( شيفاااااااااااااك يا اللى مبرق وبتنق مافينااااااااااااش من كده ههههههههههههههههههه ))

عيد ميلادى الاولانى اتعملى هنا

(( فى اللينك هنا ))

وتانى عيد ميلاد امبارح فى الكلية

وتالت واحد النهاردة بردو فى الكلية

الاولانى مش هتكلم عنه اللى عايز يشوفه يدخل على طووووووووووووول على اللينك

التانى بقى اللى كان اخر مسخرة

من اول لحظة شرا المصاصة لحــــــــــــــــــــــــــــــد ما روحت البيت

رايحة بكل جدية للسوبر ماركت قبل ما اروح الكلية اقول للراجل لو سمحت المصاصة دى بكام

فقالى ب 50 قرش ، قلتله طيب عايزة بخمسة جنيه قالى خدى

قلتله ما انا ماعرفش كام (( شايفين الذكاء الالمعى بتاعى ههههههههههههههههههههه ))

الرجال ما طاقش بقى راح بيقولى هو انتى فى سنة كام يا ابلة

انا طبعا بقيت فى وسط هدومى

بس عملت نفسى عبيطة وقلتله فى تانية جامعة ، فى حاجة ؟!!

هههههههههههههههه

بعدين روحت الكلية وزعت المصاصة (( اللى ماكفيتش اصلا هههههههههههههههههههه ))

واتبقى البلالين

واقفين مستنين المحاضرة تشتغل مش راضية تشتغل قولتلهم خلاص نشتغل احنا

وزعت عليهم البلالين بس بشرط اللى تاخد بالونة تنفخها

ونفخوها فعلا هو صحيح فى واحدة ولا اتنين صهينوا ههههههههههههه بس الباقى قام بالواجب

المهم هاتك يا لعب بالبلالين على خفيف وراحت واحدة استندلت ووقعت من على السلم وراحت لصاحب نصيبها ):

جيت بكل فصاحة اكتب على بالونة (( بعد مانفختها )) هابى بيرز داى لبنوتة لاسعة راحت مفرقعة فى وشنا كلنا

وطبعاً الدنيا كلها سمعت اللى حصل بعدها

هههههههههههههههههههه بجد العيال فى الكلية بقوا يبصولنا باستغراب

العيال دى كانت عاقلة ايه اللى جرالها ؟!!!!!

هههههههههههههههه

والعيد ميلاد التالت كااااااااااااان توداااااااااااااااااى

لأن صديقة كفاحى واحلى اخت فى الدنيا دودو ماكانتش موجودة امبارح

فعملنا عيد ميلاد تانى النهاردة بمصاصة بطعم الكولا (( على اساس انها بيبسى بقى وكده ))

وبالعاب نارية والنهاردة كان فى هدايا

هههههههههههههههههه

الرقابة حذفت فقرة الهدايا منعاً للحسد ههههههههههههههههه

كانت معكم مراسلتكم المهيسة اللى مش نايمة كويس من يومين

الجريمة الكاملة ..

امبارح افتكرت نفسى اخيرا ارتكبت الجريمة الكاملة

بس للاسف اتاكدت انها مستحييييييييلة

الموضوع ومافيه انى كل يوم قبل ما انزل لاااااااااااااااااااااااااااااازم اشرب اللبن

(( على اساس انى فى كى جى تو ))

وانا بصراحة بشربه علشان جربت ما اشربهوش واغمن عليا كذا مرة فحرمت واتأدبت

لكن امبارح كنت متأخرة جدا على صاحبتى وسايباها ياعينى ملطوعة على المحطة

وماما جابلتى اللبن والا تشربيه

اوووووووووووووبا طيب وبعدين ؟!! اللبن سخن مولع ومش هعرف اشربه بسرعة

رحت خرجت من اوضتى لأن ماما فيها ودخلت اوضة اخويا

وضبت مخبأ محترم للبن ونزلت وماما تأكد عليا شربتى اللبن ؟؟!!

اقولها طبعا يا ماما انتى بتتكلمى فى ايه

وطول ما انا فى الكلية مرعوووووووووووووبة لماما تكون اكتشفت

رجعت البيت متوقعة تهزيئة معتبرة لقيت الموضوع عدى

فرحت وظأطأت واستنيت لحد بالليل

وسخنت اللبن وشربته زى اى بنوتة محترمة

ونمت وانا مطمنة على جريمتى الكاملة

والصبح لقيت ماما مستغربة

بتقولى فى حد شرب لبن واللبن ما نقصش ازااااااااااى؟؟؟؟؟؟؟؟؟؟؟!!!

قلتلها بسم الله الرحمن الرحيم ازاى يعنى يا ماما ؟؟!!

قالتلى اهو فى كوباية مطرحها لبن وفى كنكة اللبن !!!

والمهم ماما استغربت ودخلت اوضتى تصحى اختى واووووووووووووووووووبا شافت كوباية اللبن فى اوضتى

زقونا يا مرزوووووووووق واتحاصرت

واضطريت اعترررررررررررررررررررررف

(( ملحوظة )) التوبيك ممكن ما يكونش ليه اى لازمة بس انا مهيسة ولازم اتكلم والا طقيت

واحنا متفقين من الاول ان المدونة دى مساحة للتهيس الحر

سلاموووووووووووووووز