في بيتنا شبح

بصوا بقى انا قررت احكي لكم على اللي بيحصل في بيتنا

وانتوا احكموا بنفسكم

لأني كل ما اقول لحد ان " في بيتنا شبح " ما بيصدقنيش

وبيقول في سره اني لسعت واللي كان كان

وان قراية ما وراء الطبيعة اثرت على قوايا العقلية

بصوا والنبي واحكموا انتوا كده

لما اقلع نضارتي في الصالة وادخل اتوضا

اطلع من الباثروم ادور عليها ما الاقيهاش
رحت صليت قبل ما الصلاة تفوتني ولبست نضارتي التانية وقعدت ادور عليها

يوووووووووم

يووووومييييين

تلاااااااااتة

اسبوووووووع

مافيش فايدة ..

قلبت الشقة كلها من فوقها لتحتها .. مافيش فايدة .. مفقودة مفقودة يا نضارتي

واذ فجأةَ كده بعد كام شهر الاقيها في الجنينة !!

مع العلم ان الجنينة دي جنب البيت يعنى بينها وبين الصالة اوضة كاملة

مع العلم كمان ان احنا ما عندناش اطفال (( انا اخر الاطفال في بيتنا ))

والنبي قولولي مين وداها هناك ؟؟

لأ و الغريب بقى اني لقيتها سليمة !!

يعنى لو افترضنا بأي حال من الأحوال انها وقعت من الشباك كان زمانها اتفشفشت

بلااااااااااااااااااااااااش دي

الاتوجرااااف

الاوتوجراف بتاعي كنت قاعدة اقرا فيه قبل ما انام

هو و حوالي 3 أعداد من رجل المستحيل

ونمت وحطيتهم جنبي .. جنب السرير

صحيت تاني يوم مش لاقياهم !!

باكدج هههههههههههه يعنى مثلاً اقول الاتوجراف متداري هنا ولا هنا

طب والـ 3 رجل المستحيل راحوا فييييييين ؟؟

تفتكروا منى توفيق طمعت في الاتوجراف ؟؟ ولا أدهم ؟؟

وقلبت الشقة يجي 100 ألف مرة بردو ما فيش فايدة :((

ولحد دلوقتي مفقود

كل دا طبيعي ؟؟!!

طب بلاااااااااااش دي

كل يوم الساعة 4 الفجر في صوت حد بيعمل لمون في الخلاط

(( ماعرفش اشمعنى لمون
ههههههههههههه بس بحسه لمون ههههههه ))

لأ بجد والله كل يوم في صوت حد بيعمل حاجة في الخلاط

الغريبة ان البيت بيتنا .. مافيش فوقنا سكان

والعمارة اللي جنبنا الست اللي ساكنة في الشقة اللي جنبنا ما بتقدرش تمشى

(( او كانت ما بتقدرش لأنها الله يرحمها بقى ))

والغريب بقى ان الصوت مش بيتسمع الا في اوضتنا بس

اوضة اخويا على نفس الخط .. ولازقة في العمارة بردو ومش بيسمع الصوت دا

وانا واختى بنسمعه يعنى مش انا لوحدى مثلا وبخرف

دا طبيعي ؟؟؟؟؟؟؟؟؟

طب نسيبنا من دي

القطط بتاعتي

القطط بتاعتي كنت باخدها ونطلع الروف

الاقيها فجأة كده تنحت وبرقت لفراغ على السلم مش فيه اي حاجة .. وتقعد تنونو
وتستخبى فيا

او تقعد تكلم الهوا

الغريب بقى ان القطط بعد فترة بتختفي من بيتنا

ومش حد من البيت بيسربها لأن ماما بتحبهم وبابا عارف اني هجيب غيرهم ومافيش فايدة

الأغرب بقى انهم لازم ليلة ما يختفوا يجيوا لي في الحلم

قاعدين على السلم في مكان معين كده وبيبصوا لي وهم زعلانين

واخر واحدة اختفت كلمتني كمان !!

طيب بلااااااااااااااش دي

في ليلة من ذات الليالي .. كل اللي في البيت كانوا نايمين

بعدين ماما حست بحد بيفتح الباب بتاع اوضتها

والبيبان بتاعة الاوض عندنا بتعمل فرح وهي بتتفتح أصلاً

يعنى صعب يكون بيتهيألها

المشكلة مش كده المشكلة انها شافت ظل حد طويل .. مش طويل بشكل مبالغ فيه لأ انسان
عادي بس طويل

وقف على الباب دقيقة ومشى

المشكلة بقى بجد انها افتكرت نفسها بتحلم لكن لما صحيت من النوم لقت الباب مفتوح فعلاَ !!!!

ومن دا كتيييييييييييير بقى ما تعدوش

حاجات تختفي وتظهر من غير سبب

وصوت حاجات بتقع تنكسر وما نلاقيش حاجة مكسورة

وصوت ناس بتمشى في الشقق اللي فوقينا اللي هي أصلا فاضية

يبقى ليا حق بقى ولا ماليش أقول في بيتنا شبح ؟؟