جاءنا التاج التالى .. فى الحقيقة كانوا 2 تاج مش تاج واحد .. وبقوا 3

التاجين دول جولى من عند احلى وارق بسكوتة

بس بصراحة واعرين جوى جوى يابوي

يلا استعنا على الشقا بالله

التاج الاول

اذكر 6 اسرار قد لا يكتشفها من يقابلك لاول مره ؟

1 / انى مش هادية زى ما كل اللى بيشوفونى بيقولوا

2 / انى عصبية جداً وبردو الناس بتفتكرنى طيبة اوى وهادية مش بعرف اتعصب
3 / انى رغاية .. فى بداية معرفتى بالناس ببقى صموتة اوى فياعينى بيفتكروا ان دا على طول هههههه
4/ انى كئيبة احيانا .. كتير من الناس بتشوفنى بهزر وبضحك فبتفتكر ان مافيش حاجة فى الدنيا مزعلانى
5/ انى غريبة .. يعنى بعمل كل حاجة بطريقة غريبة

يعنى حتى تقليب الشاى بقلبه غير الناس .. وبغصب عنى مش بتعمد

6 / انى كسولة .. كل ماحد يشوفنى لو شافنى برا البيت بيحس انى فراشة بتنطط من هنا لهناك لكن بمجرد ما بدخل بيتنا بحس انى مهدووووودة وماليش نفس اشيل ايدى من مكانها اصلا

التاج التانى

اذكر 16 صفه عن نفسك

حرااااااااااااااااااااااااااااااااااام

:(

1/ متمردة

2 / احلامى اكبر من قدراتى

3 / بتحمس بسرعة وبفقد حماسى بنفس السرعة ومن غير اسباب

4 / متقلبة جداً وهوائية

5 / بعشق الشتا

6 / بعشق الليل

7 / مرنة جداً يعنى بقدر اتأقلم مع اى ظروف

8 / الحمد لله بقدر اكون متفائلة فى ظل اى ظروف

9 / احياناً يكون عبيطة بس بمزاجى

10 / كلامى ليه معنى واحد بس .. يعنى مش بعرف اقول كلمة وانا اقصد بيها كلمة تانية

وللاسف دايماً الناس بتعاملنى العكس بتعاملنى على اساس انى اقصد معنى تانى

11 / بعتبر نفسي محظوظة الحمد لله

12 / خيالى واسع اوى وبيودينى فى داهية

13 / فى نفس الوقت واقعية جداً وعملية اوى

14 / ما بعرفش اتكلم عن نفسى (( علشان كده انا محتاسة دلوقتى ))

15 / بحب الموز اوى ههههههههههه اعمل ايه مش لاقية صفات

16 / بحب اوى ان الناس تعاملنى زى الاميرات ههههههههههه

اذكر احلام تخص ماضيك كنت هتتخلى عن ايه وحققت ايه لحد دلوقت ؟

كنت زماااااااااان نفسى اطلع مزورة فى المخابرات والمشروع فشل فاتجهت للصحافة

حققت خطوات فى بلاط صاحبة الجلالة هاااااااا يا مسهل يااااارب

اذكر شخصين على الاقل موجودين فى حياتك وكنت تتمنى وجودهم من قبل ؟

احم .. الشخص الاول ....

و التانى دكتور عندى فى الكلية اسمه د/ امين بجد بحسه زى والدي

اذكر شخصين غير موجودين فى حياتك وتتمنى وجودهم مستقبلاً فى حياتك وحياة ولادك ؟

زوج صالح يراعى ربنا فيا ويكون زيي كده مجنون بس بعقل

وبس دا كفاية فى وجوده مش هكون محتاجة لشخص تانى

_____________

مش ممكن مش معقول

خلاوويص

ياااااااااااااااااااااااااااااااه

انا مش هبلى البلوة دى لحد خااااااااااااااااااالص

غير بس اللى دخلوا هنا

شايفاكم واحد واحد كل واحد ياخد التاج فى ايده ويحله

ههههههههههههههه

_________________________

تحديث مهم بالتاج رقم 3

:((

لولا انه جاى من اخ بعتز بيه كنت طنشته كتير بس ما قدرش اآخر واجب لعرفة ابداً

ندخل فى الموضوع

1_ ما أكثرَ شئ فعلتـَهُ وتركَ لكَ ألمًا نفسيًا .؟

اممممممممممممممممممممممم مش عارفة والله .. انا شايفة ان الاسوأ والاكثر إيلاماً لسة ماجاش

ربنا يستر

يمكن ما يجيش حاجة اعتبرها اكبر الم نفسى لأنى من النوع اللى بيحاول يتخطى الازمة بسرعة

وبحاول اخرج من كل تجربة مؤلمة بحاجة تخلينى اقوى

ٍ2_ ما أكثرَ حادثةٍ عامة ٍتركتْ لكَ جرحًا نفسيًا .؟

سقوط بغداد :(

بجد يوميها عيطت اوى

و انا عمرى ما كنت بعيط علشان حدث فى الوطن العربى بس بجد يومها حسيت انى اتكسرت

َ3_ ما أكثرَ حادثة ٍ خاصة ٍ تركتْ لكَ جرحًا نفسيًا.؟

موت قططى .. مش الفكرة انهم قطط لأ انا مش ببص لهم كده
انا فى وقتها كانت القطط دى الصديق الوحيد ليا
كنت بقضى معاهم وقت اكتر ما بقضيه مع اهلى
دايما كنت منعزلة عن باقى البيت وبفضفض وبلعب وبعمل كل حاجة مع القطط
فلما ماتوا سابوا فراغ رهيب فى حياتى وصدمة رهيبة
وكنت بدأت احس انى كل ما احب حد يموت
فلحد دلوقتى انا مش قادرة انسى الالم اللى حصلى بعد موتهم

4_ هل تعيش ُ الآن قصة َحب ٍ تتمنى أنْ تنتهى بالزواج ِ .؟(سؤال رخم)

إحمـ .. ليه كده يا عرفة ايه السؤال دا

هحجب الاجابة

سيدنا محمد - عليه افضل الصلاة والسلام - امرنا نستعين على حوائجنا بالكتمان :)

5_ كيف َ ترى الآخرين َ .؟ كيف تحددُ علاقتـَكَ بهم .؟

امممممممممممممممممم

اقول الحق وماحدش يزعل منى

بجد شايفة ان البعد عن البشر غنيمة

طول ما انت بعيد عن الناس او بينك وبينهم مسافة مش هيبقى فى مساحة للغدر والخداع

ولكل حاجة وحشة

6_ ما أكثرَ شئ ٍ يسببُ لكَ أحراجًا مع الآخرين .؟

اممممممممممم

نسيان مش الاسماء بس زيك يا عرفة لأ انا بنسى كمان التفاصيل

يعنى ببقى فاكرة الانسان دا بالشبه كده لكن مش فاكرة لا الاسم ولا اى حاجة

واحيانا بفتكر الاسم بس مش بفتكر مثلاً هو دراسته ايه

او مثلا منين او الحاجات دى

وطبعاً بتفقس مع اول كلمتين هههههههههههههههههههههههههه

ِ7_ منْ هو أقربُ شخص ٍ إليك .؟

برجاء حددْ شخصًا مع عدم ِ الإلتزام ِ بذكرِ اسماء أحد

(( اقول فيك ايه يا عرفة :( حراااااااااااام عليك ))

احم .. اكيد اقرب حد ليا هو الانسان اللى بتمنى اكمل معاه حياتى

ما هو حلمـُكَ لحياتـِك مستقبلا .؟

حلمي لحياتى انى اعيش حياة مختلفة مش روتينية وانى اعيش مع انسان بحبه وبيحبنى بجد مش لعب عيال

وانى احس بأمان

وما هو حلمـُك لوطنـِك .؟

ينصلح حاله حكومةً وشعباً

لمن ْ تمررَ الواجب .؟ ولماذا .؟1

اباصيه لــ

1 - حاتم عرفة .. علشان غيرانة منه تصميماته تحفة بصراحة (( دا مش سبب انا اللى بتلكك هههههههههههه ))

2 - شادي اصلان .. بمناسبة عيد ميلاده اللى جه اول يوم رمضان

3 - سينيور بدر .. علشان بقاله كتير غايب لعله خير يارب

4 - MaGn0lia .. علشان عايزة اعرفها اكتر

5 - بسكوتتى .. (( بس هتاخد اخر جزء بس )) طبعاً السبب معروف انا لسة ملسوعة منها فى تاجين ههههههههه

وبث خلاص